دوسرے کی منکوحہ سے شادی کی خواہش ہو تو پھر کیا کیا جائے؟

سوال

 میں اور میری کزن آپس میں ایک دوسرے کو پسند کرتے تھے اور نکاح کرنا چاہتے تھے، لیکن  گھر والوں کی وجہ سےاچانک سے اس کی شادی کہیں اور ہو گئی ، اور اب بھی ہم ایک دوسرے کو چاہتے ہیں، کوئی شرعی راستہ بتادیں ،مہربانی ہو گی، بہت ڈیپریشن میں مبتلا ہیں، اب ہم کس طریقہ سے نکاح کر سکتے ہیں؟ شرعی راستہ تاکہ اللہ کی پکڑ میں نہ آجائیں ، نماز تہجد یا اللّہ کی ذات سے دعائیں ،  اس طریقے کی دعا جس دعا کی وجہ سے پکڑ نہ ہو۔

جواب

صورتِ مسئولہ میں سائل اپنی جس کزن سے شادی کرنا چاہتا تھا اور اس کی کہیں دوسری جگہ شادی ہوگئی ہے تو اب سائل کو چاہیے  اس کزن سے شادی کی خواہش کو ترک کردے، کیوں کہ وہ اب کسی اور کی بیوی ہے،  اس کو اپنے شوہر کے ساتھ زندگی گزارنے دے، اپنی اس خواہش کو باقی رکھ کر اور اس کی کوشش میں لگ کر اپنے آپ کو مزید پریشان نہ کرے۔

سائل کو چاہیے کہ اپنے آپ کو ڈپریشن سے بچانے کے لیے اور اس نفسانی خواہش کو ختم کرنے کے لیے خوب اللہ سے دعا مانگے اور مندرجہ ذیل دعا کا کثرت سے  ورد کرے:

” رَّبِّ اَعُوْذُبِکَ مِنْ هَمَزٰتِ الشَّیٰطِیْنِ وَاَعُوْذُ بِکَ رَبِّ اَنْ یَّحْضُرُوْنِ .”

نیز سائل کو چاہیے کہ کسی اور جگہ شادی کرلے۔ اللہ سے امید ہے کہ ان دعاؤں اور شادی کی برکت سے اللہ پریشانی کو دور کردیں گے۔ فقط و اللہ اعلم

---

---